D'r is eine tiëd van kômme en van gaon, auch veur ein broëdspaar. Op ut Sjpruutjesmatinee, net veurdet ut niëje paar bekend wuurt gemâk zal ut broëdspaar aafsjiëd neme en verder gaon as Erme Tak binne ut gezelsjap. Dees aafsjloëtende sirremonie is hiëlemaol in heng van ut Traum Team. Zoë numt zich de klup van aadbroëdspaare die ut aaftraejende paar op ludieke wiëze in eur midde opneme. Door de sjtaldeure geit ut paar met de getuuge den truuk in de anomiteit. Aadbroëdspaare binne ut gezelsjap ziën te herkenne aan de sjpeld met de twieë klômpe en eur boëre jaortal dao beej ingegrafeerd.

Ut Traum Team helt meistal op de letste zaoterdig in juni eur jaorliks oëtsjtepke. Traditie is inmiddels de picknikmang met al det lekkers van ut boërelangk en oët de sjtal. Die mang geit altiëd meij met de fiets en op ein sjoën plekske vingk den de picknik plaats. Verder is ut jaorliks ein verrassing wat de organisatie waer oët de aek haet gedreijd. Ein versjlaag van de daag met foto sjteit ut jaor d'r op in de Belhamelkrant.

---