In ein woörd: GEWELDIG!!

Aafgelaupe zondig waas ut zowiët; weej mochte os eindelik aan uch bekend make. Al maonde laupe weej met vraoge rônk wie ut geit waere en now is de kop d’r AL AAF.

Zaoterdig thoes ut de kinger verteld onger ut genot van een sjtukske kerboët; zeej koste ut in ’t begin auch neet geluive, net as weej. Zeej vonge ut “super vet”! De femilie waas auch hielemaol in de boëne en hadde, ondanks heur drûkke programma, volop zin in ut Spruutjesmatinee.

Zondigmorrege: in ozze vertrouwde hoónderstal Juliana krege we de vuurproof. Os Getuuge ware inmiddels al opgehaold en sjtonge versjtop en vol zenuwe achter de sjerme.

Ut geit beginne…..

Broëdspaar 2011, Theo en Mariëlle met heur Getuuge Hans en Nicole hebbe idderein bedank veur ut toffe aafgelaupe jaor det zeej same hebbe gehad. Met vuuël gejuich hebbe de Boere heur auch bedank. En toen waare weej aan de beurt. D’n ceremoniemeister John Engelen kreeg ut woord van de hoësmeister Ron van Zoest. Nao ein, veur ôs hiel sjpannende inleiding, sjpronge weej nao veure en waas ut iës gebrôke. Ze weite ut!! Wie zulle ze ôs en ôs getuuge ontvange?! Maar toch noch effe psssst!

Met een lake euver de kop ginge we in ein buske nao Giedje en dao zou ut den ech beginne. Um os haer huürde we vanalles maar we koste netuurlik niks zeén. Sjpannend…. Binnegekomme sjnel umtrekke, cape um en ut masker veur. Op de bühne woórd de sjpanning opgebouwd en weej maar wachte op ut verlossende waord van ozze ceremonimeister: ut Broedspaar van 2012 met eur Getuuge zien:

                                               Maarten en Silvia en Luc en Patty

Wow;  Ut waas nog geweldiger den det weej os veur hadde kenne sjtelle. De hiële zaal ging tekiér, idderein zông oet volle bors en de muziek met ut dao beej huuërende leech haet os de hiele middig gedrage. Super muziek van Maarten Geurts !!

De toekoms van de Belvendse carnaval haet dreej reije diek veur ôs op de bühn sjtoan geneéte en sjwinge met heur gezich nao pappie en mammie, die dao ongetwiefeld net zoë van hebbe genaote as weej !!  Wat unne heerlikke middig beej Giedje!! Same met de Prins, zien dansmarietjes en al die kinger op de bühne, hebbe weej os kenne gaeve. Minse, wat un genot um zoëvuul enthouzjas volk beej elkaar te zeen geneéte.

Weej allemaol same, Belhamels en Belhamelinnekes, weej kleure deze vastelaovend!

Weej kenne maar ein woord zegge: GEWELDIG!!!!

Minse, wat vluug d’n tiéd !!!

Leef Boëre en Boërinne en natuurlik auch de euverige bewoëners van Belvend.

Weej winse idderein alleriërs netuurlik huul vuul gelök en gezôngkheid toe in, ein veur ôs zeker joeksig, 2012 !!!

Maar wauw, wat vluug d’n tiéd. Ut geit allemaol huul sjnel: zoë is ut zomervakansie en den knipse eine kiër met dien vingers en weej hebbe de Kerstdaag alweer achter ôzze rugk.

Zônger det geej ut in de gate heb gehad, zien d’r alweer huul vuul dinger geregeld. Um ens get te neume: veur ôs zien zeej bekend….., ôs GETUUGE !!!

Weej hebbe eur met aope erm meuge ontvange! Weej hebbe d’r den auch lang nao oétgekeke en now is veur ôs dae spits d’r vanaaf. Weej kenne nou met ôs veere verder gaon met “sjtiekum doon”. Ut is éch ein huul apart geveul, det geheimzinnige:  “Ssst….., psssst, heb geej al ? “…. “Zulle weej same….?”  en zoë komme d’r sjteeds miër Vastelaovend-kriebels en komme zeej sjteeds sjneller achterein. Nog maar ein paar waeke, en den…..!?!

En ôngertösse det die kriebels d’r zien, hebbe weej met de Boëre-keuzekemmissie alweer eine gas kiër vergaderd, zien de foto’s al gemaak en kump ôs oetkomme sjteeds doënderbeej.

Weej huure al allerlei geruchte in ut dörp: “Zou ut?” ….., “Ich dink det!” …., en gangk zoë maar door. Weej motte d’r iddere kiër sjtiekum um lache: “Zeej hebbe ut euver ôs !!!”

Wat de veurbereidinge betref, haet ôs Boëre-keuzekemmissie alles good in de hângk en waere de letste puntjes sjtevig op de “i” gezatte. Weej hebbe d’r alle vertrouwe in det weej d’r same eine waanzinnig toffe Vastelaovend van goan make!

De nieje zaal beej “Giedje” wuurd langzaam klaorgemaak en met roëd, gael en greun versierd. Auch weej helpe dao aan met, want weej kleure same met uch allemaol de Belvendse Vasteloavend!  En beej “Giedje” is det waarsjiénlik maar veur ein joar , dus ….

“Ut daak ken d’r aaf !!! …..  Weej goan d’r veur !!!”

Wies sjnel!!  (razel, razel….)

Uch Boëre Broëdspaar 2012.

Oh, oh, oh, ut kriebelt al ein bietje!!

Ut liedjesmatinee is alweer gewaes en sommige zien al bezig met de vasteloavend, net wie weej.

Weej hadde neet gedach det dit now al ôs laeves zoé kôs behiërse!

Stiekem bisse d’r iddere daag waal effe mei bezig. D’r zien toch al verschillende dinger diese môs gaon regele. Weej zien al die dinger ein bietje aan ut verkenne.

D’r komme al sjteeds mier vraoge: wie geit de vasteloavend beej ‘Gietje’ waere, wie zuut dae zaal d’r oét, komme d’r vuul minse, geit ut volop swinge en gangk zo maar door…..?!  Weej beseffe ôs det vuul van die dinger deils door én auch zeker veur ôs waere gedoan.

Verder vraoge weej ôs al aaf wie de femilies zulle reagere en ôs kammeraöj (weej hebbe d’r dreej en zien de kringk aan ut oetbreije). Wie geit idderein dae ôs kent óf neet kent ut vinge?

Eine tiëd truuk, wie weej gevraog woorte, sjprongse weej ein gaat in de lôch. Ut gaat is d’r nog sjteeds maar now det de praktiese dinge aan bod komme, beseffe weej ôs det d’r hiel vuul minse nao dich komme kiéke…… Beswaal ein vraemp idee!

Weej én geej laote ôs dus maar verrasse!

De (boere)groete van ûch Boërebroëdspaar 2012

Weej hebbe ‘jao’ gezag….

Daag Minse,

Dit waas eine zomervakansie dae net zoë raegenechtig waas én net zoë lang deurde as ut veurig jaor, maar ut waas veur ôs toch gans angers……

Inkele waeke van te veure ging beej ôs de deurbel….

Weej leepe naor binne en begôste te waazele euver van-alles-en-nog-wet. Maar al sjnel kwaam ‘DE VRAOG’!!!!  Weej waare hulemaol euverdonderd en metein begôs ut van binne te kriebele. Ut zal toch neet?! Wat…, weej?!

Ut deurde efkes, maar toen ging ut ein bietje zakke. Ut waas ech waor, weej hadde de vraog good versjtaon: “Wilt geej Boërebroëdspaar waere in 2012?”

Weej dinke det weej d’r kloar veur zien, maar det mot netuurlik nog bliéke.
Auch beej oëtsjtepkes ware ôs gedachte al dök beej de Boërebroelef van ’t kômmend jaor….

Ein dingk is zeker: “WEEJ HEBBE D’R ZIN IN !!!”