Theo van Sjaak van Sjeng van de Keije en Tien van de Mieje en van Nora van zjwart Neurke.

In 1958 bön ich op de Irenelaan gebaore. Theo Heijnen, zoon van Nora van zjwart Neurke  en van Sjaak van Sjeng van de Keije en Tien van de Mieje. Breurke van mien twië jaor aaijere zus Els. Al sjnel zien weej verhoës nao de Dwarssjtraot. Heej heb ich ein sjoëne jeug gehad. Ich waas altiëd boëte te vinge. Nao sjoël ging de euveral aan (die ze toen beej Funs van Sjtêves kôs kaupe) en ging ich lekker ravotte op de Plak of in de Brum. Toen ich tiën joar waas zien weej weer ens verhoës en weej ginge op de Pesjtoër Hermessjtraot woëne. Toen ich twellef jaor waas ging ich nao het KOW bal det in de blokhut woort gehaaje. D’r woort geloët um te kiëke wae KOW prins of prinses meugde waere. Ich deej heej natuurlik aan meij en woord prômp oëtgeroope toet de iërste KOW prins van Belvend. Det waas ut hielemaol.

Umdet ich altiëd aan het knômmele waas bön ich nao de Mavo ein techniese opleiding gaon volge op de MTS in Venlo. Toen ich dao vur gesjlaag waas bön ich gaon werke beej de service van ein groëte lampefabriek oët Eindhove. Dao heb ich vuël tillevisies en videoos meuge reparere. In de wiekénde ginge weej met ein sjtel kammeraöj altiëd oppe lappe. Vuël ware weej in Tegele te vinge, destiëds beej de Lange. In dees kefee heb ich auch ut maedje van mien druime gevônge wao ich in 1984 met bön getrouwd.

Later bön ich nao Eindhove gaon werke wao ich mien bes doon um het vak aan angere minse oët te legke. Met de vastelaovend nim ich altiëd vreej. Den môs se neet beej ein bedriëf zien wao ze neet éch weite wat vastelaovend viëre is.

Marita van Piet van Hendrik van de Sjloës en van Mie van Jeu van de Pin en Gon van de Quick

Miene naam is Marita Heijnen-Sloesen. Op 26 december 1961, ut waas iëskaat, woort ich gebaore in Tegele op de Acaciasjtraot, as dochter van Piet van Hendrik van de Sjloës en van Mie van Jeu van de Pin en Gon van de Quick. Ich bleek nog twië  breurkes te hebbe, Mattie en Hennie. (Die heite nôw Mat en Mack?? en woëne in groët Venlo.) Ich had ut geweldig thoës, lekker vuël boëte sjpeule en kei leeve elders.

Met de vastelaovend waas ut auch leuk, iërs woort ich fijn verkleid en dén ging ich met pap en mam meij oët in Tegele. As ut laat genôg waas, woort ich weggebrach, nao oma en opa oppe Hei. Wiej ich groëter woort, ging ich zellef nao ut Zaelke. Det ligk d’r nog sjtiëds. Wie ich nag groëter en versjtendiger woort, meugde ich nao de Poshoëssjtraot in Tegele. Pap en mam ware den in de buurt.

In 1980 ging ich wir nao de Poshoëssjtraot, op eine gewoëne zôndigaovend. Dao kwaam ich eine leuke jông taege, eine Belvender, Theo dus. Ut klikde geliëk. Mien breurs, die vuël aaijer zien den ich, hele mich veur de gek met eine jông oët zôn klein gaat. Weej hele vol, besjlote te trouwe en in Belvend te gaon woëne. Op de Prins Hendriksjtraot. Det waas in 1984, 25 jaor geleeje.

Inmiddels waas ich ôngerwiezeres gewaore en werkte regelmaotig op de Leijgraafsjoël.

In 1987 reisde weej nao Sri Lanka, um os iërste kiendje te adoptere. Ein maedje, Sanne. In 1991 meugde weej wir nao det zellefde lank, ôzze zoon Thom ophaole. Weej hebbe  dus twië kinger, die al get aaijer zien. Sanne  (22 jaor) woënt nôw nao zien sjtudie in Breda. Thom (18 jaor) woënt nag thoës.

Ich werk nôw al jaore in Belvend op BS Kom.Mijn en wil iëwig heej bliëve werke en woëne. Want …. al bön ich in Tegele gebaore, ich bön ein gelökkige Belvendse gewaore !!!!!!

Getuuge:

Dré van Hein van Drees van de Kroëk van vader oët ut sjtraötje en van Bets van Lies van Thei van Fritskes Thei (De Vingk)

en

Mariëtte van Jan ven Klerken Sef en van Truus van Kesjtiëls Frens (Beesel)