Leef Boere & Boerinne!

Veur de meiste van ôs is de vakansie waallich net begôs, veur ein deil boere zit hae d’r al op en de rés mot mesjien nach efkes wachte, maar……
De “BKK”, oftewaal Boere Keuze Kemmissie ken met ein gerös hert de badlakes, d’n tandeborstel en de Belhamelkrant van aafgelaupe seizoen in eur koffers goeije : d’r is namelik witte rauk aan d’n boerehiëmel te zeen !!!! Met de klanke van de vuvuzela’s nach vers in ut geheuge, de barbecueworste in groéte getale in ôs keul-kés en de kuüte broën van al det gefiets, is d’r beej éin Belvendse femilie alwir de Vastelaoves-meziek sjtiekum in de cd-sjpeuler gesjtaoke! Maar, wie zjwaor ut auch geite waere, zeej hebbe nog eine lange tiëd te gaon veurdet zeej oét volle bors meij kenne zinge ....

Urgend halverwaege fibberwari zult geej allemaol weite wae ôs nieje Boere Broëdspaar in 2011 zal zien! Wies dae tiëd zulle weej uch, net wie veurig jaor, via de Belhamelsite op de huuëgte haaije van eur belaevenisse de kommende maonde…..
Names de ganse Kemmissie wins ich al ôs boere & boerinne en alle Belhamels nach eine sjoëne zomer én ein gooije veurbereiding op ut nieje Vastelaovesseizoen!

Met eine boeregroet,

John van Ingele
Ceremonimeister