De Belvendse kunstenaer Har van der Linden haet veur de kômmende vastelaovend
d'n Opstaeker 2012" ontworpe.
Names CV de Belhamels oét Belvend had veurzitter Bert Nabben dit jaor de iër um 'n kunstenaer
veur te drage oét naam van alle viéf de stadsdeilvereiniginge.
Veur Van de Linden waas 't 'n groëte verrassing det de veurzitter van de Belhamels um vroog.
"Ich vind 't 'n groëte iër um veur alle vastelaovesvierders in de gemeinte Venlo d'n Opstaeker te meuge ontwerpe.
Dao bin ich hiël erg gruuëts op", zaet Van der Linden. "Ich bin dezelfde aovend begôs mit 'n aantal ontwerpe.
Daonao ben ich de sjetse gaon oétwerke. In totaal heb ich d'r viéf gemak".

Oétintelik hebbe Jocus, de Wortelepin, d’n Oeles, de Belhamels en de Keieschiéters unaniem gekaoze veur ein ontwerp.
"Det zoel ich zelf auch gekaoze hebbe", zaet Van der Linden gruuëts.
"'t Is 'n vrolijke "vastelaoves-snoét" dae opgebouwd is oét de beginletters van de viéf stadsdeile van de gemeinte Venlo en symboliseert de samewerking tösse de viéf stadsdeilvereiniginge.
De figuur lach veur inkele daag alle zörg weg.
Hae viert vastelaovend zoë wië 't huurt, mit vuul "joeks en jen", um daonao de hectiek en stress van alle daag te kinne trotsere", alzoë de Belvendse sjilder

'D'n Opstaeker™ ' is 'n soort broche die sjteit veur 'n dreejtal zake; 'n bliek van waardering veur de vuuële vreejwilligers die allerlei vastelaovesaktiviteite organisere in Venlo, Bliërick,
Tegele, Belvend, Arce en Velde; 'n bliek van betrokkeheid met de 'vastelaovend' en 'n financiële opstaeker veur alle vastelaovesvereiniginge in de regio.
De vief stadsdeilvereiniginge van de gemeinte Venlo haope det de inwoeners, net wie verleje jaor, weer massaal deze vastelaovesbroche zulle koupe um daormei de vastelaovesactiviteite
van de diverse vereinige te óndersteune. D'n Opstaeker™2012 is te koup vanaaf 11-11. 

Har van der Linden, van 3 maart 1943, is gebaore en getaoge in Belvend.
Hae is altiëd hiel aktief gewaes met vastelaovend.
“Netuurlik heb ich meigedaon met de Belvendse Optoch, heb auch vastelaoveswagens gesjilderd. Maar ich bin ouk sjurylid van de optoch gewaes. Ich heb zelfs 'n gas kier 'n buut gemak”. In 1984 woort van der Linden oëtgerope toet Prins Carnaval. Auch is hae ruum tiën jaor veurzitter gewaes van de ald-prinsevereiniging. “Veur mich is vastelaovend 'n neet mier weg te dinke volksfiës waor se gezellig met idderein kins kletse en zinge”.

Van der Linden is altiëd maatschappelik betrokke gewaes. Hae is jaorelangk wethalder gewaes in de Belvendse gemeinteraod en zelfs nog 'n tiëdje locobörgemeister. De veurmalige programmeur van Océ- van der Grinten zaet noëit te hebbe gedach oëits te gaon schildere. “Det ich bin gaon schildere is puur toeval. Ich bin lid van 'n kaegelklub die regelmaotig andere aktiviteite organiseert. Op dees wiës heb ich kinnisgemak met Gerda van der Sterren (Opstaeker™ 2010 red.) waor we tiën aquarellesse krege. Ich vond 't zoë leuk det die tiën lesse veer jaor woorte. Daornao heb ik nog les gehad van Bob Tomanovic in Leiden`.

Van der Linden schildert veurnamelik symbolische werke met zoëgenaamde ´naat in naat´ aquarelleertechnieke in aolie glaceertechniek. Beej naat in naat ontsteit 'n saort ´gesteurde spontaniteit´, zoëdat 't werk 'n neet van teveure vasgestelde vorm zal kriege. Naeve symbolisch schildert van der Linden ouk abstrak, figuratief, realistisch. Werke van um hange in ónder mier in Nederland, België, Duitsland, Engeland, Rusland en Canada.

Har van der Linden is 'n echte laatbleujer dae zaet det 't schildere mier is dan 'n hobby. `Veur mich is schildere 'n obsessie, 'n obsessie waor ich mich erg good beej veul`.

Miër informasie euver Har van der Linden is te vinde op www.harvanderlinden.nl.