De Bliërickse kunstenares Gerda van der Sterren haet veur de
kômmende vastelaovend D'n Opsjtaeker ontwôrpe.



Oët 'n aantal ideeje hebbe Jocus, De Wortelepin, d'n Oeles en De Belhamels
't oëteindelikkke ontwerp gekaoze. 'T is 'n brök met 5 ballonne. De letste ballon
sjtelt de gemeinte Arce en Velde veur met de dorpskern Lomm die richting
Venlo kômme.

D'n Opsjtaeker is ein soort broche dae sjteit veur 'n dreejtal zake: 'n bliek van
waardering veur de vuulevreejwilligers die alllerlei vastelaovesaktiviteite organisere
in Venlo, Bliërick, Tegele en Belvend; 'n bliek van betrokkeheid met de
vastelaovend en 'n financiële opsjtaeker veur de vastelaovesvereiniginge. De veer
sjtadsdeilvereiniginge van de gemeinte Venlo haope det de inwoëners, net as
veurgaonde jaore, wir massaal dees vastelaovesbroche zulle kaupe um daomeij
de vastelaovesaktiviteiten van de diverse vereinige te ongersjteune.

Gerda van der Sterren druuëg de vastelaovend 'n werm hert toe. "'t Is ein uuting
van kreativiteit op allerlei gebiede". De Bliërickse aquarelliste, det jaorelangk veur
de klas haet gestaon, is min of miër autodidact. "Ich heb altied geschilderd en
netuurlik heb ich verschillende cursusse gehad. As ich 'n opdrach krieg, laef ich
mich  in 'n bepaolde situasie hielemaol in". De Bliërickse kunstenares schildert
zoëwaal abstrak as netuurgetrouw.

Vanaaf d'n 11de van d'n 11de toët aswoensdig is 't darge van D'n Opsjtaeker
2010 gewins. D'n Opsjtaeker makt vastelaovend 2010 meij meugelik.