Carnavalsvereiniging

De Belhamels

Belaevenisse

Jeugboerebroedspaar

Belaeveniss JBB-Nag gèn waek mieër…

27-01-2020

‘t Nieje jaor is inmiddels begós. Nów kump vastelaovend 2020 waal erg doeën beej. Sjpannend!!!! Weej kènne nów gaon aaftelle! Nag gèn waek mieër. Tjuu…wat vluug d’n tied. Óngertösse hebbe weej neet sjtil gezaete en hebbe weej same mèt ós elders vanalles bekokstoof. Same mèt de keuze commissie zien weej waer op ’n geheime lokatie gewaes wao weej lekkere leuk hebbe gegaete en de puntjes op de i hebbe gezatte. ‘t Waas nów neet mieër zoeë sjpannend as de ieërste kieër.  ’t Sjpringe mótte weej nag get oefene maar det kump ouch good. De smoesjes die weej mótte verzinne zien bienao op en ’t leefste sjrieëfde weej ’t oet! Gelökkig is ’t bienao 2-2-2020 en den is ós geheim nimmer ós geheim maar kènne weej zègge: Weej zien JBB 2020! Haopelik kómp geej allemaol nao de Hamar öm mèt ós det fieësje te viere want vastelavond viere duisse same!

Alaaf JBB 2020

Belaeveniss JBB- Weej wille ouch wir efkes van ós laote hure

21-12-2019

Óngertösse zien weej alwir ’n paar maond verder. Achter de sjerme gebeurt d’r al vanalles.

De kleier zien inmiddels gepas en dao mós waal efkes get verangerd waere öm ’t good passend te kriege maar oeteindelik is dit gans good gekómme en is ’t toch waal wenne öm ós same te zeen in ’t sjpeegel met de kleier aan en kap en pet op ózze kop.

Same mèt ós elders zien weej in het geheim al ‘nne aovend beejein gewaes öm planne te make, tuurlik waas det ‘nne aovend mèt vanalles lekkers. Leuk is det öm same det groeëte geheim te meuge deile mèt elkaar want ’t deurt toch nag efkes vurdet ‘t 2-2-2020 is. De mix mèt al ós favoriete liedjes is al klaor en heej kènne weej veskes op sjpringe zoeëdet weej ouch genog conditie hebbe. Want ’t geit KNALLE!!!!

Op ‘nne duustere aovend zien weej foto’s gaon make. Óngerwaeges toch waal get kriebels in d’n boek.  Tjuu…nów veur ’t eggie in vol ornaad van sjoon wies kap en pet en alle accessoires d’r beej! Wat hebbe weej dao al ’n lol gehad. D’r zien hieël get foto’s gemak. Jaomer det weej uch nag niks meuge vertelle heej euver maar det got geej waal zeen op de posters, belhamelkrant en ós reseptiekaarte. Ouch weej zelf zien mega niejsierig nao ’t resultaat. Sjpannend!!!!!

Vastelaovend liek nag hieël wied weg. Gelökkig hebbe weej bienao de fieësdaag en dus ouch vakantie. As weej den waer nao sjoeël gaon, kènne weej beginne mèt aaftelle.

Weej winse idderein sjoeëne fieësdaag en ’n gezónk en gelökkig niejaor toe!
En det ’t gauw 2-2-2020 meug zien want weej hebbe d’r zin in. Geej ouch?

JBB 2020

Belaevenisse JeugdBoerebroedspaar 2020

22-10-2019

Op ‘nne daag kreeg mam de vraog of weej dae avond thoes ware. D’r waas emes dae iets wól
kómme vraoge. Zelf huurde ich pas net van te veure det d’r emes kwaam en ich dus neet mieër boete
moch sjpeule. Toen zeej mèt z’n dreje binne kwame, wis ich waal wat zeej ginge vraoge. Ich woort d’r
hieëlemaol sjtil van, maar heb waal JAO gezag. Leuk!! Mèt pap en mam heb ich nów ein groeët
geheim.

Ich lik al in bed, verrassing zaet mam. Ónger aangekómme dink ich WAUW! En metein kreeg ich de
vraog JBB 2020? YESS! ‘nne druim dae oetkump. Gaar neet mieër verwach maar waal sjtiekum op
gehaop. Ouch pap en mam zien gans verras en mèt ós 3 hebbe weej den ouch waal ’n träönke
gelaote. Same mèt de keuze kemmissie hebbe weej geproos op ’t JBB 2020!

Sjpannend mèt wae ich dit fieësje meug bouwe. Óngertösse begint ’t al te kriebele en zien weej
allebei al sjtiekum aan ’t oefene mèt sjpringe en danse.

Den is ’t zoeë wied. Op ’n geheime locatie zitte weej mèt ‘nne blinddook vur ós ouge taegeneuver
ein . 1,2 en 3….YESS! Efkes waas ’t sjtil van de sjpanning maar daonao hebbe weej al vuuel gehuurd
wat d’r allemaol geit gebeure en hebbe weej zelfs al hoeswerk gekrege.

Iets kènne weej waal verklappe weej zien 2 ras echte vastelaovesvierders!


ALAAF JBB 2020!