Aafgeloupe waek is door de Veiligheidsregio Limburg-Noord aangegaeve det der gezeen alle Corona-óntwikkelinge, gèn activiteite meuge plaats vinge in ’t kader van ’t insjete van de vastelaovend in Noord-Limburg. Heej óp hebbe diverse vereiniginge de activiteite op de 11e van de 11e gesjrap.
Ofschoeën de Belhamels inzeen det ’t insjete van ’t vastelaovesseizoen in Belvend ’n zieër kleinsjalige activiteit is, is C.V. De Belhamels toch de meining toegedaon zich achter ’t advies van de Veiligheidsregio te sjare. Daoröm zal der op zaoterdig 13 november a.s. dus neet waere ingesjaote. De gezónkheid van de bezeukers van dees activiteit én de óntwikkelinge in de zörg waege zjwaorder den ’t door laote gaon van dees activiteit. Weej betreure ’t det weej neet angers kènne den dit besjloet te nimme.
Wat dit besjloet ouch beteikent vur ’t verdere verloup van vastelaovend in Belvend, kènne en wille weej nag neet op vuroetloupe aevel weej zulle heej taege dae tied op nie nao kieke. Waal zal in idder geval op de 11e van de 11e gesjtart waere mèt de verkoup van de “Opsjtaeker” dae dit jaor is gemak door de Belvendse kunstenares Sabrina van Wylick. Mieër informasie heej euver volg nag.
Besjteur C.V.De Belhamels