De Belhamels

Jeugdhoogheden 2022

Eindelik is ’t zoeë wied………
Nao 2 jaor corona, gènne vastelaovend kènne viere, meuge weej uch toch op dees biezóngere wies ós jeug Hoeëghede prizzentere. Wat hebbe zeej lang mótte zjwiege, aevel nów meuge zeej toch nag efkes twieë daag knalle.

Names alle Belhamels Van Herte Perficiat mèt uch oetroping!!

Jeugboerebroedspaar

JASMIJN & SIEM

JASMIJN

Hoi allemaol! Ich wil mich efkes aan uch veursjtelle. Miene naam is Jasmijn Aan de Brugh. Gebaore op 17 juli 2008 in Viecuri.

Ich woeën same mèt miene pap Rob, mam Kim, Broor Daan, ózze hónk Joep en mien dreej kiepe op de Sjoeëlsjtraot in Belvend. Ich zit in het ieërste jaor op Agora in Remung beej juffrouw Joëlle, iddere daag gaon ich mèt de bus nao sjoeël, hieël gezellig!

In miene vreje tied hockey ich beej Delta in Venlo in ‘t MC-8 team. Ouch sjpraek ich gaer aaf mèt mien vriendinne en doon ich gaer gèt lekkers bakke!

Vastelaovend viere doon ich same mèt miene pap, mam, mien vriendinne en net zoeäs Siem mèt ós vrinde van VK Neet Kepot Te Kriege. Idder jaor loupe weej mèt de optoch mei in Belvend. De vastelaovend is mich mèt de paplaepel ingegaeve. Op basissjoeël de Kommijn bön ich vruueger oetgerópe toet prinses van het Kommijnenriek en twieë jaor truuk moch ich deil oet make van de raod van 11 beej KOW, dit waas allebei geweldig öm mei te make.

Toen ze mich kwame vraoge in Oktoeber naodet ich truuk kwaam van ‘t hockeye en de dames van de Boere zoog zitte sjrók ich mich kepot. Ich waas der gans sjtil van, maar van binne waas ich super super bliej, dus heb ouch metein “jao” gezag op de vraog of ich jeugdboerebruudje wól waere.

En gans te gek det ich same mèt miene Broedegom Siem ’t jeugdboerebroedspaar meug vórme. Want in de vreje tied zien weej hieële goje vrinde van ein. Wie leuk is det!

SIEM

Hoi! Beej dees sjtel ich mich gaer efkes veur.... Ich bön Siem Kurstjens. Ich bön gebaore op 12 februari 2009 in het ziekehoes in Venlo. Ich woeën same mèt mien mam Vivian, pap Geert en breurke Wout op de Sjportlaan in Belvend. Ich zit in Venlo op sjoeël, op Den Hulster in de 1e klas.

In miene vreje tied voetbal ich beej Belfeldia, beej JO13-1. Ouch voetbal ich gaer mèt mien vrinde en bön ich vuuel lekker boete bezig. Drumme doon ich ouch gaer. Det doon ich iddere vriedaagaovend beej de jeugdhermenie van Harmonie Kunst na Arbeid. Verder ving ich lekker chille óppe bank ouch heerlik!

Vastelaovend vier ich al van kleins af aan mèt pap, mam en Wout en mèt mien vrinde. Ouch mèt de vriendegroep VK Neet Kepot te Kriege doon weej altied mèt de optoch mei. 2 jaor geleje zoot ich beej de raod van 11 van de KOW. Det waas ech hieël tof. Det ich now jeugdboerebroedegom 2022 meug zien ving ich super!! Ich waas der sjtil van wie ze mich vroge. En heb der ech hieël vuuel zin in! En zeker same mèt Jasmijn, ömdet weej ouch al hieël lang vrinde zien!

Weej make d’r same ein groeët fieës van!

KOW – WOUT II

Super, super bliej waas ich toen papa en mama mich vertelde det mien lötje waas getrókke beej de KOW en det ich de nieje Kowprins meug zien. Ech supertof!!

Maar wat mós ich ‘t geheim nag lang beware. Poeh, det waas bes lastig maar is gelök. Nów is ‘t eindelik bekènd en zal ich mich efkes aan uch veursjtelle.

Miene naam is Wout Kurstjens. Ich bön 10 jaor en woeën op de Sjportlaan same mèt papa Geert, mama Vivian en mien broor Siem. Ich zit op de Kommijn in Belvend, in groep 7N beej juf Janou.

Mien groeëte hobby,s zien voetballe en trompet sjpeule. Voetballe doon ich beej vv Belfeldia, beej JO11-1. Heej bön ich 3x in de waek te vinge. Op dinsdig en donderdig traine en op zaoterdig de wedsjtried. Ouch bön ich lid van Harmonie Kunst na Arbeid. Ich zit beej ‘t kingerhermenieke en verheug mich iddere waek op de repetities van vriedigaovend!

Nao sjoeël en in ‘t wiekend sjpraek ich hieël gaer mèt mien vriendjes aaf öm lekker boete te sjpeule en te sjoeje.

Vastelaovend vier ich al van kleins af aan. Verkleie en sjminke ving ich altied ‘t leukst. Idder jaor loupe weej de optoch mèt ózze vriendegroep VK Neet Kepot te Kriege. Det is altied eine hieële gezellige daag.

Same mèt de dansmerietjes, de nar, ‘t  sjaop, de raod van elf en uch allemaol gaon ich der ein geweldig fieës van make!

Alaaf

Groetjes Prins Wout II

JCB – GUUSJE I

Wao is det feesje? Heej is det feesje….

Ich heb der enorm vuuel zin in, geej ouch?

Op de verjeurdaag van pap kreeg ich te huuere det ich “Guusje Colbers” Prinses 2022 zal waere. Joehoe, gewuuen geweldig! Dit had ich noets dörve druime. Dit is ech gèn grap mam? As dansmerietje beej de KOW had ich al ’n geweldige tied, aevel dit geit TOP waere!~

Zoeëas de meiste ónger uch waal weite, zien weej er altied beej tiedes de vastelaovend. En wat is d’r now sjoeëner den zelf hoeëgheid te meuge zien.

Ich bön 14 jaor en zit in 3 Havo op ’t Blariacumcollege te Blierick. Same mèt pap, mam en mien zuske Yfke en ós 2 katte (Fudge en Fozzie) woeën ich op de Pr.Hendriksjtraot. In miene vreje tied zit ich op scouting en riej ich paerd.

Tiedes de vastelaovend zuus se mich mèt de boere of mèt ózze eige groep ’t Jeuk wir. Zoeë mis ich neet sjnel ’n fieësje.

Gaer wil ich dit jaor same mèt uch dit groeëte fieës viere. ’T Is wir efkes geleje maar vastelaovend viere det verlieëre weej neet!

Prinses Guusje I