Broedspaar:
Sins ‘n aantal waeke weite weej mèt wae weej dit vastelaovesavontuur gaon meimake! Nao hieël
lang wachte op ein kaemerke baove in ’ne winkel zoge weej eindelik wae dao die trap op kwaam.
Wat waar det sjpannend en bezónger óm mei te make! Mèt z’n vere hebbe weej ós allemaol ein
sjoeëne outfit beejein gezóch en zien weej gans op elkaar aafgesjtumd. Nao aafloup hebbe weej
netuurlik nag ff same geproos en d’r eine gedrónke op de vastelaovend 2024!
En toen woorte d’r foto’s van ós gemak en hebbe weej hieël vuuel lol gemak same. Gans sjtiekem
nao ‘n geheime lokasie en dao mèt ós sjieke pekskes aan woorte weej veur de ieëuwigheid vasgelag
op ein plaetje. Weej zien nów al benied nao de foto’s die de kómmende periode euveral opgehange
zulle waere. Wae geit ós herkènne? Gaon weej geraoje waere?
Weej zien ouch ontzettend benied wae de angere hoeëghede zulle waere in ‘t dörp en in ‘t bezónger
netuurlik ‘t jeugboerebroedspaar: mèt wae sjtaon weej sjtrakkes op die bühne? Weej mótte nag
efkes wachte, maar zien waal al aaf aan ‘t telle.
Getuge:
En den mósse dich sjtil haje. ’t Broedspaar meug ós neet huuere. Weej hebbe ein vermoede, zeej
ouch. Maar is ‘t den daadwerkelik wae se dink det ’t zal zien? Weej sjluipe de trap op, einmaol baove
sjteit de kemmissie mèt eur tillefoons klaor öm ‘t moment vas te legge. En daor sjtaon ze. Achter ’t
gordienke. Wat ein ontlading! Nów geit ‘t den ech beginne. Weej drinke thoes mèt ’t broedspaar nag
ein glaeske öm ’t te viere. In de waeke daonao, hebbe weej vuuel kontak gehad öm alles aaf te
sjtumme. ’t Liek ver weg, maar de tied vluug. As weej den same sjtaon beej de fotoshoot, kump ’t
toch allemaol beejein. Nów nag ein paar waeke röstig haje en den is’ t zoeë wiet. Haopelik haje weej
’t vol, zónger ós te versjpraeke.