Adjudant
Ich kwaam thoes van ’t sjporte en ich had nag maar 11 minute euver öm te douche en öm te kleie want d’r waas ’n verrassing vur mich. Aangekómme op ’n geheime lokasie dach ich: Wat is dit…..De jeugkemmissie sjtóng om mich haer mèt de vraog: Wat dinkse desse heej kumps doon? Ich kreeg ’t werm en vóng ’t hieël sjpannend. Toen ich wis mèt wae ich dao same sjtóng ging ‘t daak d’r aaf. Dees aovend zól ich noets mieër vergaete!!
Prins(es)
Aafgeloupe zomer had ich mich opgegaeve vur de Belhameljeug. In de tied daonao had ich mien mam al mieërdere maole gevraog of zeej al gebeld waas gewaore. “NAE”waas sjteeds ’t antwoord. Op ‘nne aovend mós ich nao ein vergadering van de Belhameljeug op ’n geheime lokasie. Toen ich dao aankwaam woort mich verteld dat ich in ’t trio zoot maar nag neet mèt wae of welk rol ich had. De angere twieë ware d’r ouch al, maar idderein sjtóng in ’n angere ruumte. Weej woorte alle 3 geblinddook en langs mekaar gezatte. Idderein telde aaf van 11 nao 0 en de blinddook woorte losgemak. Weej woorte door de jeugkemmissie gehusseld wies det weej good sjtónge en toen had ich door welke rol ich had! Det had ich ech neet verwach maar ich vóng ‘t metein Supersjiek!!
Adjudant:
Begin oktoeber mós ich zoeëgenaamd örges get ophaole. Weej belde aan en d’r deje twieë bekende gezichte aope en ich dach: Wat is heej aan de hangk. Zeej vraoge of ich wis waoveur ich heej waas en ich zei: ”Iets ophaole” maar det weit ich nów neet mieër hieëlemaol zeker. Zeejzeie det ich dao waas vur ’t trio. Ich sjrók hieël efkes en dach det ich druimde. De bel ging en de lètste kwaam binne. Ich trilde ’n bietje en zeej ginge van 11 nao 0 telle. Nag sjteeds is ’t raar öm dit te beseffe. Maarja weej ware nag neet klaor want wae waas wat? Ze ginge ós sjteeds hussele en op ’n gegaeve moment klopte ‘t. Dit was ‘t. Ich kèn neet wachte wies det ich dit eindelik meug gaon zègge en oet meug kómme.