Bruudje
Ich waas baove, dao waer ich gerope, of ich nag efkes nao ónger kós kómme. Wat now wir, dach ich.. Dao loup ich de keuke in en sjtaon dao inèns 4 extra vraemde minse in dekeuke. Dit had ich effe neet aan zeen kómme.. Ich woort op ‘nne sjtool gezatte, en zeej vele mèt de deur in hoes. Weej hebbe ein vraog vur dich… Ich kós allein maar lache, aevel waas ouch ‘n bietje van mien sjtökske. Of ich ‘t Bruudje van 2025 wil waere. NETUURLIK!! JAO, hieël gaer, dao hoofde ich neet euver nao te dinke. Geweldig! Maarrrr… mèt wae?? De niesjierigheid waas aangewakkerd. Aevel dao mós ich nag efkes op wachte. Eindelik waas ’t zoeëwied, weej móste nao ‘n geheime locatie, en ich woort boete al geblinkdookt. Zoeëdet ich maar niks zoog, en weej móste moessjtil zien. Wie ich mèt miene broedegom taege euver elkaar sjting, ginge de blinkdeuk aaf, en ich waas bliej.. Dit ving ich leuk, gaaf! Toen hebbe weej ‘ne houp vraoge beantwoord, en veskes geoefend mèt danse en sjpringe.. man ich kèn neet wachte!
Broedegom
Ich weit nag as de daag van gister, det ich oet mien bed gelich woort door mien elders. Wied in miene remsjlaop zoot ich nag toen der in eine kieër 4 vraemde beej ós aan de keuketaofel zote. Wat die kwame doon waas mich neet gans dudelik, aevel ‘n bietje sjpannend vóng ich ‘t waal. Nao ein paar hints begós der get te dage beej mich. Zou ‘t den ech zoeë zien? Zou ich now gevraog waere öm de jeugboer te waere vur 2025? En jao huur. Dao kwaam de vraog! Mèt roeëje blosjes op de wange zei ich volmóndig jao! De volgende mórgen mós ich toch ech efkes aan mien pap en man vraoge of ich neet gedruimp had. Op ‘ne doordewaekse daag mós ich mich same mèt mien elders melde in een hoes wao ich nog noets gewaes waas. Nao ein paar minute móg ich mèt ‘ne boereblinkdook de gank op. Dao mós ich hieël sjtil wachte toetdet mien bruudje binne gebrach woort in de hoeskamer. Daonao mógte weej aaftelle en tegeliek de blinkdook aafdoon. Mèt die kump ‘t zeker good öm ‘ne sjoeëne vastelaovend te viere as twieësjpan van de jeugboere. Toen de sjpanning weg waas, hebbe weej geproost mèt ein diek sjtök vlaai en gèt lekkers te drinke. Daonao kreeg ich vur de ieërste kieër de scepter mèt de klomp in de heng. ‘t Waas ein bietje ónwennig, aevel ich heb de ieërste danspeskes same mèt mien bruudje gezatte op dae aovend en det sjmakde net wie de vlaai, nao mieër!
Same
De derde aafsjpraok waas de kleier passe, weej woorte aangekleid en dao sjtinge weej wir! Efkes kieke in de sjpegel wie weej d’r oet zeen.. Top!! Dao krege weej vur de twiede kier dae scepter met de klomp en boeket in de heng. Supersjiek det de vastelaovend al get doender beej is gekomme. Maar het is waal nog huul lang wachten, umdet de vastelaovend pas zoe laat is dit jaor.