Prins:
Óngertösse zitte weej alwir in december en kump 17 januari sjteeds doeënder beej.
In de aafgeloupe maonde heb ich netuurlik neet sjtil gezaete. De sjteek en mantel zien gepas, ‘t pak hink inmiddels klaor en de foto’s zien ouch al gemak. Wie ich in vol-or-naat veur de lens sjting beej de fotograaf, kwaam ‘t besef: dit geit éch gebeure!
De vergaderinge mèt de prinsekemmissie zitte d’r ouch alwir op, en wat ware die gezellig! Als det ‘n veurbode is vur de res van de vastelaovend, den heb ich d’r alle vertrouwe in det det gans good geit kómme!
Ich weit zeker det weej d’r same ‘nne fantastische vastelaovend van gaon make! Same gaon weej Belvend in veur en vlam zette!
Res mich niks angers den uch sjoeëne fieësdaag te winse en wies 17 januari!
Boere broedspaar + getuge:
Noets geweite wat vur gek geveul det kós zien: ‘n geheim beej dich drage waose sjtiekem kei bliej van wuuers en waose minse langzaam euver huuers sjpeculere, maar oeteraard niks euver kwiet kèns…. Wae wuuert ’t boerebroedspaar van 2026?? Nou, vur ós waas de aafgeloupe tied vural de vraog: wae wuuert ós getuge? Angersöm waas ‘t vur ós as getuge netuurlijk de vraog: wae zal det boerebroedspaar toch zien wao weej “jao” taege hebbe gezag?
Inmiddels weite weej det van mekaar…. Maar wat deurde ’t dae daag lang vurdet ’t zoeëwied waas.
Mèt van binne ein vastelaoveshert det nag noets op zoeëvuuel plekke tegeliek haet geklop sjtónge weej te wachte. Wat waas det sjpannend, maar dao ging den eindelik de gordien aope. Yess, wat ware weej allemaol bliej. Nao flink get geknoevel kóstte weej ’t geheim eindelik mèt ós vere gaon deile. Ózze aovend kós neet mieër kepot… Weej dronke d’r ‘nne, nag ‘nne en prooste same op dae sjoeëne tied dae ós sjteit te wachte. Wat hebbe weej d’r same ongeluiflik vuuel zin in!
‘n Paar waeke later woorte weej op ‘n geheime lokasie verwach öm ós nieje pekskes aan te trèkke. Örges in ‘nne boeresjtal woorte prachtige plaetjes gesjaote. Wat waas ’t kaad, maar gelökkig zörgde ‘nne lekkere sjnaps d’r veur det weej ein klein bietje in veur en vlam woorte gezat.
En den huuerde weej vanmorge via de app det ós raojfoto’s binnekort te zeen zulle zien. Wae zól geej allemaol gaon raoje…. geej mós èns weite…..’