D’n Opstaeker 2026, ein ôntwerp van Maarten Grob
D’n Elfde van d’n Elfde, wuurt auk weer D’n Opstaeker™ veur ’t iërs te kaup aangebaoje. Dit jaor is det ein extra biézôndere gelaegeheid, want ’t is eine echte jubileumeditie: 2 x 11 jaor! Dit jaor velt de iër te beurt aan Maarten Grob.
Maarten is naeve grafisch vormgaever auk illustrator, maar probeert auk op andere maniere zien kreativiteit in te zette. Zoë guuëf hae gaer kreative ‘workshops’ aan kinder en waas hae aafgelaupe jaor ein van de ‘Wijkmakers’ in de Bliërickse wiék Vastenaovendkamp. Same mit de bewoëners werkte hae aan ’t door um bedachte Vlaggeprojek mit as doel de saamhuuërigheid in de wiék te verbaetere. In Venlo is Maarten auk bekind as d’n teikenaer van ‘Koekwaus’, wao hae ein aantal bukskes van haet gemak en wao noow auk ein leuk niej projek van löp: de Koekwaus Kruumeltoch. Taeves is hae ônderdeil van teikenaerscollectief Usake Wok, det onder andere bekind is van ‘Greekbaer’.
Auk al is Maarten ‘neet van heej’, hae haet de vastelaovend van jôngks aaf aan gevierd. Det deej hae iërs as kind same mit zien elders in Tegele, en later auk tiédes zien studie in Mestreech. Nao zien studie is d’r auk ein periode gewaes waobeej vastelaovend waat minder aanzeen genoot, maar taegewoordig viert hae ’t weer, same mit zien gezin of mit zien vrinde. In ’t ôntwerp van D’n Opstaeker is det ‘same viere’ dan auk truuk te zeen. De letters van Vastelaovend zien allemaol as gezichte weergegaeve. Det is de verwiézing nao ’t sáme mit mekaar viere, maar waal op dien eige wiés.
D’n Opstaeker 2026 is vanaaf d’n Elfde van d’n Elfde verkriégbaar via de samewerkende vastelaovesvereiniginge. D’n opbrings kump gehiël ten bate van de vastelaovend binne ganse Gemeinte Venlo.
