Jeugboerebroedspaar Sem Hermans en Pleun Boots.
10e Jeugbroedspaar van Boerebroelef C.V. De Belhamels.
Op zóndig 21 januari is in ‘nne good gevulde “Hamarsjtal” ós 10de Jeugboerebroedspaar oetgekómme:
Sem, aadste zoon van Rob, van Guus Hermans van Lot van de ventwage oet Maasbree en van Truus van Pier en Anna en van tant van Spee. En van Annemien van de Sjoeëlstraot van Theo Langendonk van de meziek en Mia Dings oet ‘t Oelesriek.
En van Sandra van Ben van Herm van Sef Beijers en Grit Simons en van Nelly Coopmans van Baan van den Bos en van Merie van d’n theije. En van Jeanne van Willem Van Beers, de sjnieder oet ‘t Braobantse langk en van Billa van Jacobs van de Roezestraot op Steijl.
Pleun , jóngste telg van Rik van Coen van Jan van Boets, fanatiek fluitist beej Belfeldia en Belhamelinneke Mies en van Ell van Sjaak van Rievers van de Industriesjtraot Tegele en Mie oet ‘t Worteleschrabbersriek
en van Eveline van Hans van Lei van Sigarefabriek Smit in Tegele en Sientje oet ‘t Blauwvingersriek Zwolle en van Hilda van Jan van Klompe Piet oet Nabben in Tegele en Annie oet ‘t Keieschietersriek.
Sem en Pleun loupe dit Vastelaovesseizoen vurop in de jeugboerebroelef as ‘t tiende jeugboerebroedspaar van de Belhamels.
Sem Hermans is 12 jaor aad en woeënt op de Kromme Hook same mèt ziene pap Rob, mam Sandra, breurke Wout, zuske Livvy en eur hónk Mojo. Hae zit in groep 8 van basissjoeël Kom.mijn.
Nao sjoeël geit hae gaer sjpeule mèt zien vriende en klasgenote, dök gaon zeej den jachseizoen doon of voetballe. Dit letste is zien groeëtste hobby en is den ouch al mieër den 6 jaor lid van Belfeldia en voetbal in de JO13-1 as verdeidiger.
Pleun Boots is 12 jaor aad en woeënt same mèt eur zus Babien, pap, mam en knien Boefje oppe Tegelsewaeg in Geloë.
Zeej zit op het Agora in Roermond in de ieërste klas. Voetbal is eur groeëte passie. ‘t Voetbalt al hieël get jäörkes beej vv Belfeldia. Sins dit seizoen in ein ech maedjesteam, MO15. Super tof!
Daoveur hebbe zeej al ein aantal jaor same in hetzelfde voetbalteam gesjpeult.
Dees vastelaovend gaon zeej d’r op oèt
as jeugboerebroedegom en -broed!
Op vastelaovesdinsdig hebbe zeej öm 17.00 oor eur Boere-resepsie in de Hamarsjtal.
